6314
-
雪為心 2023-10-08 18:41:16第七場《相會》 玉堂：【倒板一句】青磐紅魚了卻今生孽債。【二王下句】阿彌陀，阿彌陀，參拜如來。（白：喃嘸喃嘸喃嘸阿彌陀！） 者香：【小曲】抑悲懷，痛分釵，思玉堂，費安排，追憶既往，碎我情懷，徘徊步步，相思有債，今晚羞贈寒衣，會夫偷來相慰解，惟有低聲淺叫，夜深敲門又向郎君一嗌。（白：開門啊大師） 玉堂：【梵天曲】暗里心猜，真費安排，正在禪房打坐，何以人聲呼喚，嬌聲將我嗌，阿彌陀，阿彌陀，又不知誰來費解。 者香：（白：亞大師啊，我唔該你開門啦） 玉堂：唉吔吔，嚦嚦鶯聲進寺來，梵宇夤夜又有誰來，我欲看未敢看，怕是重逢那分釵。 者香：（白：開門啊大師） 玉堂：唉，又怕離群孤雁飄泊天涯，忍令飄零金粉怨恨傷懷，呢個出家人，呢個出家人。慈悲為大，都要好言相誠。 者香：（白：大師，快啲開門啦大師，企響門口好凍㗎） 玉堂：（口古：哦！誰個半夜敲門，你快把原因說得爽爽快快。） 者香：（口古：唉，大師，你是否係梅玉堂公子，在此念佛持齋） 玉堂：（口古：咁係又點，唔係又點呢？我反問你一聲，你與梅玉堂關系如何，何以你會問起梅玉堂咁奇怪。） 者香：（口古：梅玉堂是奴夫婿，你莫再閉門不納，今夜好應該相會呢個苦命裙釵。） 玉堂：（白：哼，難得你仲有面嚟見我） 者香：（白：呵，真係好笑喇，我點會冇面來見你啫，開門啦）【花】我已備寒衣夜送，溫暖你個久冷情懷，今晚破鏡重圓，一切當能諒解。（白：喂，你仲唔開門，係唔係想冷死我得㗎？） 玉堂：（白：哈哈你仲想我開門俾你啊，唔該你係門口冷死佢仲好過喇你）【花下句】此乃莊嚴佛地，豈容你送抱投懷，何況你蟬曳殘聲，莫再把殷勤來賣。 者香：（白：喂，你真係咁忍心唔開門囉啵？） 玉堂：（白：都話唔開囉） 者香：（白：真係唔開） 玉堂：（白：唔開） 者香：唉！【快下句】愿憑一死釋疑懷，闖死在寺門，【花】以求脫解。（白：你真係唔開） 玉堂：（白：我開喇，） 者香：（白：唔開就死咗佢啦） 玉堂：（白：喂，喂，我開喇，開喇開喇，哎吔唔好死喇你） 者香：（白：唉吔，梅郎，） 玉堂：（白：阿彌陀佛，喂，喂，喂，唔該你放手啦前世呀放手喇） 者香：（白：我把你個負心郎，你個無情鬼） 玉堂：（白：喂，喂，你唔好咁大聲啊，俾人聽見唔得了㗎） 者香：（口古：我有萬語千言，要鬧你一個淋漓痛快） 玉堂：（口古：唏！我怕咗你喇你起身啦，請到禪房之內，細訴情懷。起啦起啦） 者香：（口古：唉，夫啊，何以我今日到此進香，你一見我就避入禪房呢，深恨你個冤家過太囉，） 玉堂：（口古：仲好講，你都算對得我住囉你，原來你難堪寂寞，竟作紅杏出墻，今日仲帶埋個情夫嚟拜佛，哼，好在我親眼見，唔怪得亞媽將你嘥。） 者香：（白：唉，你有怕不知㗎喇）【乙反中板下句】腸斷訴沉冤，未言先灑淚，堪憐此苦命裙釵，勞燕兩分飛，禍劫起蕭墻，恨二叔與家姑，將奴出賣，用酒醉娥媚，醒來方知覺，竟將我嫁與別個和諧，寧為玉碎以存貞，竟得結義金蘭，【花】愿郎你對儂諒解。（白：呢就係今日同我進香個位李存義喇，你千祈唔好誤會啊） 玉堂：（白：乜你哋結義金蘭咩？） 者香：（白：哦，唔通你咁都唔相信我囉啵，若果唔係嘅我何苦半夜三更都嚟揾你呢） 玉堂：【花】唉一面之詞難諒解，既無人證，未敢盡信你嘅心懷。若得同見親娘，方敢對嬌妻諒解。 者香：（口古：哦，咁你想見你亞媽呀，哼！難囉，原來佢將我改嫁之后，便與二叔二嬸把全部家財夾帶啦） 玉堂：（口古：唔係啩，你點知呢又？佢哋已把家財盡佔，又何苦遠走天涯呢） 者香：（口古：哼，你唔信添啊，老老實實話俾你聽啦，好在惡有惡報咋，佢哋夾帶家財，在郊外竟遭我嘅義兄，把全部金銀珠寶盡行劫嗮） 玉堂：（口古：哦，咁原來你個所謂結拜大佬係賊嚟嘅，佢又打算怎樣安排） 者香：（白：等我講俾你聽啦）【花下句】佢經已物歸原主，你又何必念佛持齋，快些還俗回家，莫負我青春少艾。 玉堂：【花下句】我已焚香念佛，又豈能與你白首同諧，出家容易歸家難，不敢把清規破壞。 者香：（白：我係要你還俗㗎喇） 玉堂：（白：唔得嘅呢） 者香：（白：返去喇） 玉堂：（白：唔返嘅喇）
